ကြေကွဲငှက်များ၏ တနင်္ဂနွေညနေခင်းကို သင်သိသလို စာလုံးပေါင်းပါ
ကြေကွဲငှက်များ၏ တနင်္ဂနွေညနေခင်းကို သင် ဘယ်လိုစာလုံးပေါင်းမလဲ
ခေတ္တနွေယဥ်စွန်းတန်းရဲ့ အသွားအပြန်မရှိတဲ့ ရထားလမ်းတွေရဲ့အပေါ်မှာ မြူဟာ အလှဆုံး မိန်းမပျို၊ နီယွန်မီးရောင်ဟာ ဆေးတံဖွာနေတဲ့ အဘွားအိုပဲ၊
ညတွေဆို ကောင်းကင်ကို တစ်ဝကြီးမော့ကြည့်ပြီးမှ သူတို့ ခေါင်းပေါင်းပေါ် နှင်းမကျတာ ပုံပြင်မဟုတ်မှန်း သတိထားမိကြပေမယ့် ကြယ်တွေ သိပ်လှကြောင်း၊ ရှောစောင်တစ်ထည်ဟာ အလွန်အရေးပါကြောင်း ကလေးတွေကို ပုံပြောတိုင်း ထည့်ပြောဖြစ်တယ်
ခြေတဖက်ဆာနေတဲ့ ကမ္ဘာမှာ နောက်ထပ်ကမ္ဘာတခုရှိတယ်
အဲ့ဒီကမ္ဘာမှာ နွယ်ကြိုးရှည်ကြီးနဲ့ လွန်ဆွဲပွဲလုပ်ပြီး ဖယောင်းတိုင်မီး ပြိုင်တူမှုတ်ကြတယ်
"သွားလေရာ အရင်သေသွားတဲ့သူရဲ့ မျက်တောင်တွေကို နှုတ်ယူပြီး အိပ်ကပ်ထဲ ထည့်ထားဖို့၊ သေသူနဲ့အတူ လည်ရွဲတစ်ကုံး ထည့်ပေးဖို့ ကတိကဝတ်ပြုပါ၊ မနက်ခင်းစျေးထဲက ခိုစာနည်းနည်းဝယ်ပြီး အနီးဆုံးငါးကန်ထဲ ပစ်ချပါ"
အိမ်နီးချင်းတွေနဲ့ မိုးပြိုတဲ့နေ့က တံငါသည်၊ ပင်လယ်နဲ့ မိုးကုပ်စက်ဝိုင်းတို့ ဆိုင်မဆိုင် သူတို့ ငြင်းကြခုံကြတယ်
ကိုယ်ဝန်ဆောင်သည်တွေကို အပြစ်မတင်ချင်ရင်နေ ဆုံးသွားတဲ့ဆွေမျိုးတွေကိုတော့ ရောက်ရာအရပ်က ပြန်ခေါ်ပါလို့ ရေဒီယိုကနေ အသံတွေကြားရတယ်
အနီးနားက မစိမ်းတော့တဲ့ မြို့ပြကို အုံ့ဆိုင်းနေတဲ့ တောအုပ်နဲ့ ရေစီးသန်တဲ့ ရေတံခွန်တွေ ၊ တစ်တီတူးငှက်တွေ ၊ ကိုယ့်အတောင်ပံကိုယ် ပြန်ပြန်ကြည့်နေတဲ့ ဘုတ်ငှက်တွေအဖြစ် မြင်လာမယ်
နောက်အစွန်းတဖက်မှာ အရမ်းမြန်တဲ့ လင်းတလို ဒါမှမဟုတ် လင်းယုန်လို ငှက်မျိုးတွေက မင်းအနား အချိန်ကိုက်ဝဲပျံနေမယ်
ဘယ်လိုမှ မနေနိုင်တော့လို့ ဒုက္ခသည်ရဲ့ မျက်လုံးထဲ နေထိုင်လိုက်ပြီး နှဖူးပေါ်မှာ ဒုက္ခသည်ရဲ့မျက်လုံးအတုကို တပ်ဆင်လိုက်တယ်
ဒဏ်ရာအသစ်တွေက ခန္ဓာကိုယ်အနှံ့က ဒဏ်ရာအဟောင်းတွေပေါ် ထပ်ပြီး ပေါ်လာတယ်
ပြာကို မီးထပ်ရှို့တော့ အမည်နာမတွေ လောင်ကျွမ်းသွားကြ၊
ဟိုဘက်အရပ်ရဲ့ သောင်ပြင်မှာတော့ သူတို့အသံတွေကို သူတို့ ရဲရဲကြီးချန်ထားခဲ့ပြီးပြီ
- မင်းသော်စိုး x ဆူးနွယ်
(၁၅.၉.၂၀၂၀)
Comments
Post a Comment