လေးလံလွန်းတဲ့ ငှက်မွေးနဲ့ ဝက်ရုပ်စုဘူးထဲက ရွှေငါးများအတွက် ရောက်တတ်ရာရာ ကဗျာတပုဒ်

(၁)

နေရောင်အောက်မှာ ဘာရှိသလဲ ရွှေငါးတော့ မရှိဘူး ချိုးရုပ်တွေပဲရှိတယ် ရေခူတွေ နှင်းခူတွေကတော့ အသံမမြည်တတ်ကြဘူး ကျွဲတွေရဲ့ တင်ပါးလိုပေါ့ 

ဘုန်းကြီးတွေဟာ အသိုးစားတယ် ရေထဲကကျားဖြူကတော့ အသားစားတယ် ဘုရားလို့ထူးတယ် 

ဘုန်းကြီးတရားက "မကြာမကြာ အခါခါ ပလီပလာ တခါတခါ ရယ်စရာ မပါပါအောင် ပြောတတ်သော ဥယျာဥ်မှူးနှင့် သူ၏ ပရိသတ်ဖြစ်သော ကလေးများသည် လေးလံသော ငှက်မွေး ဖြစ်၏"

(၂)

အချိန်ဟာ သွေးဖြစ်တယ် သွေးတွေက မပျက်မကွက် စကားဆိုတယ်

ဝက်ရုပ်ထဲက ရွှေငါးများဟာ ပုံစံခွက်ကို ပုံဆန်ခွက်လို့ရေးမိလို့ ဆန်ခွက်တွေကို ပုံထားရတာ ဆန်တွေက လှေကားပေါ်က လျှောဆင်းလာတာ လိမ့်ကျတာမဟုတ်ပါဘူး

ဆန်ခွက်နဲ့ ခံတောင်းက ပုံပြောဆရာရဲ့ ပုံပြင်ထဲ မဆိုင်ဘူး ထင်ရပေမယ့် တကယ်ခြင်စရာ ဆန်မရှိတဲ့အခါကျ ခံတောင်းကို ဆန်ခွက်အနေနဲ့ ဆန်မုန့်တခုခုနဲ့ အဆာပြေ လဲစားကြရတယ်

(၃)

ဝပ်ကျင်းထဲက ကြက်ပေါက်နှစ်ကောင်ဟာ ပုံမှန်ပဲ ကျင်းနှုတ်ခမ်းဟာလည်း ပုံမှန်ပဲ 

အိပ်မက်ရဲ့ အနားသတ်ကတော့ တော်တော်ကျယ်ပြောတယ်

ဘဲတကောင်အတွက် ဆွန်းနက်ကို ငါရေးနေတုန်း မင်းက ပုံမှန်မဟုတ်တဲ့ သံယောဇဉ်ဖြတ်စတွေကို လိုက်သိမ်းနေပြီ

မယုံကြည်သူအဖို့ အဖြစ်အပျက်တွေဟာ ထင်ထားတာထက် သိပ်သည်းလွန်းလှပါတယ်

ရှင်းလင်းထားတဲ့ တလင်းပြင်ဟာ အမွေးအမှင်တွေ နောက်တကြိမ် ပေါက်စပြုနေတာ ၊ စွန်ဟာ ကြိုးပြတ်ပြီး တံခါးကို ထောက်ခနဲမြည်အောင် ဝင်ဆောင့်လိုက်တဲ့ အဖြစ်ဟာ မထူးဆန်းလောက်အောင် ထူးဆန်းပါတယ်

(၄)

လမ်းဘေးနေသူ တယောက်ရဲ့ အိပ်မက်ကတဆင့် သူတောင်းစားနဲ့ သမ္မတက ရင်းရင်းနှီးနှီးကျားထိုးကြတယ်လို့ ငါမြင်မက်တယ်

ဒါဆို သမ္မတကြီးရဲ့ အလုပ်တွေက ပျင်းစရာဖြစ်လို့နေမှာ နောက်ပြီး ငါ့အမြင်မှာ သမ္မတကြီးက အရင်က သမ္မတကြီးနဲ့မတူပဲ ရယ်စရာ တော်တော်ကောင်းနေတယ် အများအမြင်မှာလည်း တော်တော်ရယ်စရာကောင်းနေမှာ သေချာတယ်

နောက်တက်လာမယ့် သမ္မတကိုတော့ အိပ်မက်ထဲမမြင်လိုက်ခင်မှာပဲ အိပ်မက်ကနေ လန့်နိုးသွားတယ်

လူဖြူလူမည်းမခွဲခြားတဲ့သမ္မတကြီးက ပြည်သူတွေဆီ နေ့စဉ်မပျက်မကွက်စာရေးပြီးပို့တယ် ခေါင်းစီးကတော့ 'လမ်းဘေးနေသူ တယောက်ရဲ့ အိပ်မက်ကတဆင့် ရောင်စုံပန်းများဆီသို့' 

(၅)

အမေဟာ တကယ်ပဲ ကုလားကြီးနောက် လိုက်သွားတာ

ပန်းရဲ့ဝမ်းဟာ ဗလာပဲ အိပ်မက်ထဲက စကားအပိုင်းအစတွေ တသီကြီးပွေ့ပိုက်ထားတဲ့ ကဗျာဆရာမဟာ အရောင်တွေထက် အဖြူအမည်းကို ပိုသဘောကျနေတယ် 

အဖြူရောင်ဟာ သမ္မတနှုတ်သီးဖြစ်ပြီး အမည်းကတော့ ဘဲခြေထောက်ကြားက ရွှံ့နှစ်ဖြစ်တယ်  

လူတွေထင်နေကြတာက သူတို့က အတိတ်ဘဝက ငယ်ချစ်တွေ

တကယ်က သူတို့က ချစ်ရင်းချစ်ရင်း ငယ်သွားကြတာ

ဒါပေမယ့် ဒီစာကြောင်းမတိုင်ခင် အပေါ်​ငါးကြောင်းက ကုလားကြီးဟာ ငါ့အမေနဲ့ လားလားမှမဆိုင်ဘူးလို့ ငါမပြောလိုက်ရဘူး ဘေဘီ

(၆) 

အပ်ချည်မျှင်တွေက လေမှာဝဲနေပြီး ကင်းအိမ်ကြီးက တိုင်ပတ်နေ ကင်းခြေများကတော့ ခြေတချောင်းထောင်ထောင်ပြီး တလမ်းတည်းသွားတယ်

ကင်းခြေတွေရဲ့ ဖြစ်ပုံနဲ့ လိုအင်ဟာ ပြောင်းပြန်ဖြစ်တယ်

တလမ်းသွား ရထားတွဲတွေရဲ့ စီးဆင်းပုံဟာ အလျင်စလို ဖြစ်ပေမယ့် တည့်တည့်ကို ရှေးရှုတယ်

မနောဓာတ်က နှုတ်တိုက်ချပေးတဲ့ မကြာခင်ဆိုတဲ့ တဘောင်အရ

အပျံသင်စ စက္ကူချပ်ကလေးဟာ လန့်ဖျပ်ပြီး ထပြန်သွားကြတာ ဒီလိုနှစ်တွေရဲ့မိုးဖွဲဖွဲထဲမှာပေါ့

(၇)

မြေကြီးထဲက တဖန်ထုတ်ယူထားတဲ့ ပြာအကြွင်းအကျန်တွေဟာတော့ မြေတူးသမားဆီ တိုက်ရိုက် ဒါမှမဟုတ် ကတိုက်ကရိုက် တူနဲ့ပေလို တချက် ဒါမှမဟုတ် နှစ်ချက်

ပြာတွေကို လျှာနဲ့လျက်ရုံနဲ့ အာဏာရှင်ရဲ့အရိပ်က ပျောက်သွားမှာမဟုတ်သလို မင်းမိထွေးကလည်း မင်းအမေလို မင်းကို ပြန်ချစ်လာမှာမဟုတ်ဘူး

အချိန်ဟာ သွေးတွေဖြစ်ပြီး သွေးတွေရဲ့ နောက်ထပ် မပျက်မကွက် စကားဆိုပုံက

"ဘယ်ကလာသလဲ ဘယ်နယ်ကလဲ အလယ်ကလူ စကားများလျှင် တအားချစ်၏"

- မင်းသော်စိုး ၊ ဆူးနွယ်

(၄.၁၂.၂၀၂၁)