သူအားမငယ်ဖို့
(၁၁)
သူ့အတွက်ဆို
လိုအပ်သမျှ အမြဲဖြည့်ဆည်းပေးချင်သူ
သူ့အတွက်ဆို
အမြဲ အလျှော့ပေးပြီးသား ဖြစ်နေတဲ့သူ
သူ့ဘက်ကပဲ ဘာမဆို
ကိုယ်ဟာ အမြဲရပ်တည်ပေးချင်တဲ့သူ … ။
အမြင့်ကို သိပ်မကြည့်ပါနဲ့
အရှေ့ကိုသာ
ဆက်ဆက်ကြည့်ပြီး လျှောက်ပါ
သိပ်လှတဲ့ကမ္ဘာတစ်ခုက
မင်းကို စောင့်ကြိုနေမှာ ။
ဘာကိုမဆို
ရပ်စောင့်နေတာဟာ
မှားယွင်းတဲ့အယူအဆတစ်ခု
အရာအားလုံးက ဆက်သွားနေကြရမှာပဲ ။
မခံချင်စိတ်ကို
အကောင်းဆုံးနေရာမှာ
အငုံ့စိတ်အစား
အသုံးချပါ ။
ကိုယ်ဟာ
သူ အားငယ်နေချိန်တိုင်း
အနီးနားမှာ အားပေးမယ့်
မကောင်းမှုတွေ ဖယ်ခွာ
ကောင်းမှုတွေ ညွှန်ပြပေးချင်တဲ့
ဟိုးကောင်းကင်ဘုံနားက
တမာန်တော်တစ်ပါးလိုမျိုး ။
သူ့ကို သတိရချိန်တိုင်း
တရားဝင် ဖုန်းဆက်ပိုင်ခွင့်လေး
ပေးသနားပါ ။
သူ အားမငယ်ဖို့
အပိုဒ်ခွဲတစ်ခု ဖတ်ရတဲ့အချိန်တိုင်း
ခွန်အားတစ်ခုရပါစေလေ ။ ။
(၁၂)
စာအုပ်တွေကို
သူနဲ့ ဆုံစည်းခွင့်ပေးတဲ့အတွက်
ကျေးဇူးတင်တယ် … ။
ကိုယ်ဟာ
ပျော်စရာကိုသာ ဝေမျှချိန်
သူ့ကိုလည်း
ကိုယ့်ကြောင့် ပျော်နေစေချင်တယ်
သို့သော် …
သူ့မှာလည်း မာနလေးနဲ့ ။
ရွှေဝါရောင် ဆံနွယ်လေးတွေကြားက
မျက်ဝန်းလေးထဲမှာ
သူ မဝံ့မရဲဖြစ်နေတာလေးတွေ
ကိုယ် မြင်နေရတယ် ။
သူ ကြိုက်တတ်တဲ့အရာလေးတွေ
ကိုယ်ပြင်ဆင်နေတတ်မှန်း
သူ မသိသေးချိန် …
ကိုယ် တစ်ယောက်တည်း
ကြည်နူးနေမိတာ
တစ်ဘဝစာပါ ။
ကိုယ်ချစ်သော
ထူးအိမ်သင်ရဲ့ သီချင်းနာမည်လို
ချစ်တိုင်းလည်း မညားကြပေမဲ့
ကိုယ်တို့နှစ်ဦးအပါအဝင်
ညားတဲ့လူတိုင်းတော့
ချစ်ကြစေချင်တယ် … ။ ။
(၁၃)
သူ့ကို ကိုယ်က
မချစ်တော့ဘူးလို့
ငြိုငြင်ဖို့အချိန်မရှိအောင်ကို
ကိုယ်ချစ်နိုင်ပါတယ် ။
မင်းအတွက်ဆိုရင်
ကိုယ်ဟာ
ကမ္ဘာပေါ်မှာ
အချစ်တတ်ဆုံး လူသားတစ်ယောက်
ဖြစ်ချင်ဖြစ်နေမှာပေါ့။
ကတိကဝတ်ပြုတာထက်
ကိုယ့်ကို သေချာအကဲဖြတ်ပါ
ပြီးမှယုံပါ ။
သူ
စိတ်ကောက်ချင်ကောက်ပါ
ချော့ဖို့က ကိုယ့်တာဝန်
သို့သော် …
ကိုယ့်ကို
အကြာကြီးပစ်မထားပါနဲ့ ။
ကိုယ်
ပျော်ရွှင်ဆုံးအချိန်ဟာ
သူ့ကို နောက်ကနေ
လှမ်းမြင်လိုက်ရတဲ့ အခိုက်အတန့် ။
သူဟာ ကိုယ့်ဘဝအတွက်
ဖြစ်ချင်ရာဖြစ်ပါစေ
ကိုယ်ကတော့ သူအတွက်
ဘဝလက်တွဲဖော်ကောင်း တစ်ယောက်
အမြဲ ဖြစ်နေပါရစေ ။
ကိုယ် သေချာမရေးတတ်တဲ့
ဒီကဗျာလေးတွေ
ဖတ်နေပေးတာကိုတင်
ဝမ်းသာနေမိတယ် ။
13 က
Unlucky ဆိုပေမယ့်
ဒီ ကဗျာအပိုဒ်တစ်ခုမှာတော့
ကိုယ် ကံကောင်းပါရစေလေ … ။
(၁၄)
သူ သာ
ကိုယ့်ဘက်မှာ ရှိနေခဲ့ရင်
ကံကြမ္မာဆိုတာနဲ့
ရင်ဆိုင်တွေ့ဖြစ်ကြတဲ့အခါ
ကံကြမ္မာကြီးလည်း
ပြောင်းပြန်လန်သွားလိမ့်မယ် … ။
အချစ်ဆိုတာ
ရာသီဥတုသုံးပါးမရွေး
ဆက်ချစ်နေနိုင်ဖို့သာ
အဓိကပါ ။
ကိုယ်ဟာ သူ့ရဲ့
တစ်ကိုယ်ရေ အလှထက်
စိတ်အလှကို မြတ်နိုးမိသူပါ … ။
ကြယ်တွေကြွေတိုင်းသာ
တောင်းဆုပြည့်မယ်ဆို
မင်းနဲ့နီးဖို့ အခွင့်အရေးလေးပဲ
ဆုတောင်းပါရစေ … ။ ။
(၁၅)
Telepathy ကို ကိုယ်ယုံတယ်
ကိုယ်လွမ်းနေသလို
သူလည်း ထပ်တူထပ်မျှ
လွမ်းနေမယ်ဆိုတာ … ။
သူ့ရဲ့
"ရှင့်ကိုလည်း ကျွန်မ ချစ်ပါတယ် " ဆိုတဲ့
စကားတစ်ခွန်းဟာ
( ကော်ဖီခါးခါးတစ်ခွက်လိုပဲ
နှစ်သက်မက်မောခြင်းတစ်ခုမှာ
တရှိုက်မတ်မတ်နဲ့
ကိုယ် ကျဆုံးတယ် … ။ )
သူနဲ့
ပတ်သတ်ခဲ့ဖူးသမျှ အရာတွေ
စတွေ့ခဲ့ဖူးတဲ့နေရာက အစ
အကုန် မှတ်မိနေတယ် … ။
ကိုယ်ဟာ
အခုတော့ လမ်း ၄၀ မှာ
တစ်ယောက်တည်း
ယောင်တောင်တောင် ဖြစ်နေလို့ … ။
ကိုယ့်ရှေ့မှာ
သူဟာ အဖြူရောင်
သတို့သမီးလေး တစ်ယောက်လို
အပြစ်ကင်း ဖြူစင်စွာနဲ့
မြတ်သော … ။
( ) အတွင်းမှ စာသားမှာ
သူငယ်ချင်းတစ်ယောက်၏ စကားလုံးကို
ယူသုံးထားပါသည် ။
(၁၆)
သူ ရေ …
သူ့အတွက်သာ စဉ်းစားပါ
ကိုယ့်အတွက် မစဉ်းစားပါနဲ့ ။
သူရှိနေတာလေးတင်
ကိုယ့်အတွက်
အရာရာ ပြည့်စုံနေပြီလေ
ဒါဟာ မုသားမပါတဲ့
စကားတစ်ခွန်း … ။
သင်္ခါရတရားကို
ရဲရဲလက်ခံပါ
ဖြစ်ရပ်တိုင်းမှာ အကောင်းဆုံး
လုပ်ခဲ့ကြရုံသာ
ဘယ်တော့မှ
နောင်တက ကိုယ့်နောက်
ဆက်ပြီး ပါမလာပါစေနဲ့ … ။
အရာရာဟာ ကိုယ်
ဒဏ်ရာတွေ သက်သာစေဖို့
အဆင်ပြေသလို ဆိုဖြစ်ခဲ့
အထပ်ထပ် ညည်းဖူးခဲ့တဲ့
တေးသွားတစ်ခုထဲကလို
ဖြစ်နေလိမ့်မပေါ့ … ။
သူ
ဆုတောင်းခဲ့တိုင်း
ကိုယ် ပြည့်ခဲ့ဖူးသလို
ကိုယ် ဆုတောင်းတိုင်းလည်း
သူ ဆန္ဒတွေလည်း
ပြည့်ပါစေကွယ် … ။
ကိုယ်
တစ်ယောက်တည်း
ကြိတ်ခံစားချင် ခံစားပါရစေ
သူတစ်ယောက် ပျော်ရွှင်ပါစေ
သူတစ်ယောက် အေးချမ်းပါစေ
သူတစ်ယောက် အဆင်ပြေပါစေလေ … ။ ။
(၁၇)
သူ
ကိုယ့်ကို
သူ့ရဲ့ ခံစားနေရတဲ့
လက်ရှိ ဘဝနဲ့ ပတ်သတ်ပြီး
အများကြီး ပြောခဲ့ဖူးတယ် ။
ကိုယ်
သူနဲ့ ပတ်သတ်ပြီး
စိတ်ကို အောက်ဆုံးထိ
ခေတ္တ လျှော့ချထားမိလိုက်တယ် ။
ကိုယ် ခံစားနေရတာ
သူ မမြင်စေဖို့ရယ်နဲ့
ကိုယ် ခံစားရတာကပါ
သက်သာလာမလားလို့ … ။
ကိုယ် တစ်ယောက်တည်း
ရင်နာနာနဲ့ …
သူ့ဆီ ကဗျာတွေ
ဆက်မရေးဖြစ်တော့ဘူး …
အကြောင်းကြားစာတွေနဲ့ အတူ
သူကိုယ်တိုင် ဂရုစိုက်နိုင်ဖို့
သူ့ကို သတိပေးစာတွေ
သံကြိုးစာတွေ မရိုက်မိတော့ဘူး
သို့သော် သူကြားနိုင်ပါစေ … ။
သူလည်း …
အထီးကျန်ခြင်း
သိမ်ငယ်ခြင်းတွေကို
ကိုယ်နဲ့အတူ
ခေတ်ကာလ အချိန်တစ်ခုမှာ
အတူ ဖြတ်သန်းခဲ့ကြဖူးပေမယ့်
တွေဝေခြင်းနဲ့ မဝံ့ရဲခြင်းတို့က
ကိုယ့်အပေါ်
အပေါ်ယံ ဟန်ဆောင်စေခဲ့တယ်
ဒါဟာ သိပ်မှားတဲ့အချက်ပဲ xxx … ။
ကိုယ်
သူ့ကို
ဝင်သက်နဲ့ ထွက်သက်
အချိန်နှစ်ခုလေးမှာပဲ
တိတ်တဆိတ် လွမ်းနေပါရစေကွယ်
တွေးဖြစ်သမျှ အတွေးကို
အလွမ်းတွေ ခပ်ပါးပါးလေး
ထပ်ဖြည့်မိသလိုလိုပါပဲ … ။
ကိုယ်နဲ့အတူ
သူပါ
"ကိုယ့်ကိုယ်ကို လိမ်လည်ခြင်း " ဆိုတဲ့
အချိန်ကာလ နွံတစ်ခုထဲမှာ
နစ်နေမိကြတယ်
တဖြေးဖြေး ရုန်းထွက်ကြရအောင် ။
အမည်နာမ မတပ်ထားတဲ့
ကဗျာတစ်ပုဒ်လိုမျိုး
ခံစားခဲ့ဖူးသမျှ
ဒဏ်ရာဟောင်းပေါ်က
အထီးကျန်မှုတွေနဲ့
အတူ ရောယှက်ပြီး
ကိုယ်ဟာ
ဂျစ်ပစီတစ်ယောက်လိုပဲ
ဆက်ပြီး ခရီးနှင်နေမိတယ် … ။
သူ
ကိုယ် ချုပ်နှောင်ထားမိတဲ့
အချုပ်အနှောင်ကြီးထဲကနေ
ပေါ့ပါးစွာ ပျံသန်း
လွတ်မြောက်ပါစေကွယ် … ။
(၁၈)
သူ တစ်ခါတလေ
Nightout ထွက်တာ
ကိုယ် တကယ်စိတ်ပူမိတယ်
သူ ဘေးကင်းမှ
ကိုယ် စိတ်ချလက်ချနေနိုင်တယ်
သက်ပြင်းတွေလည်းချမိတာ
အကြိမ်ကြိမ်ပေါ့ ။
ကိုယ်တို့ကြား လျှို့ဝှက်ချက်တွေမရှိဘူး
စိတ်ကောက်စိတ်ဆိုးခြင်းတွေ ရှိမနေဘူး
မလိုမုန်းထားတွေ ရှိမနေဘူး
အကြင်နာတွေ မေတ္တာတွေ
အယုအယများသာ ထွေးပိုက်ထားတယ်
မုန်တိုင်းကြီးပြီးလို့
လေပြေလေညင်းလေးတွေ တိုက်ခတ်လာပြီပေါ့ ။
အို ချစ်သော Staylor …
မြန်မာပြည်ရဲ့
အကြီးဆုံးပြည်နယ်တစ်ခုထဲက
အေးချမ်းတဲ့ မြို့လေးတစ်ခုရဲ့
ပန်းခင်းကြီးတစ်ခုထဲမှာ
ကိုယ်တို့အတူ
စိတ်ကူးထဲကအတိုင်း
ဓာတ်ပုံတွေ ရိုက်ဖြစ်ကြမယ်
ကလေးလေး တစ်ယောက်လို
ပျော်ပျော်ပါးပါး ရယ်မောပစ်ကြမယ် ။
သူ့ကို
ကိုယ့်ရင်ထဲ ရောက်တဲ့
ခံစားရတဲ့စာလေးတွေဆို
တယုတယနဲ့
သူ ဖတ်ချင်လာအောင်
ကိုယ် ပြောပြနေဆဲပါလေ ။
ကိုယ်ဟာ
သူ့အတွက်ဆို
အရာရာ အသင့်ရှိနေသူ ။
ကိုယ့်ဆီမှာ
သူ ရှိနေတဲ့အချိန်ကလေးတစ်ခုမှာ
သူ စိတ်ချမ်းသာရဖို့
ကိုယ် တာဝန်ယူပါတယ်
ဘယ့်သူ ခိုင်းစေချက်မှမပါတဲ့
ရင်ထဲမှလာသော အချစ်မျိုးနဲ့သာ
ကိုယ့်ကို ချစ်နိုင်ပါစေ ။
တကယ့်လက်တွေ့မှာတော့
စိတ်ကူးယဉ်ဆန်ဖို့
အချိန်ရှိမနေနိုင်တာကို
သူ သတိရပေးပါ ။
အခက်အခဲတစ်ခု ကြုံလာတိုင်း
ကိုယ့်ရင်ခွင်ကို သတိရပါ
သူ
ကိုယ့်အားကိုယ်ကိုးတတ်လာအောင်
ကိုယ် ပြောပြပေးပါမယ် ။ ။
မင်းသော်စိုး
Comments
Post a Comment